Bauchef:in bi de Fasnachtsgsellschaft Rhyfälde

Du hesch Freud am kunterbunte Fasnachtstribe, willsch mithälfe ä tolli Fasnacht in unsere Altstadt uf d’Bei z’stelle und imene igspielte Team zäme schaffe? Denn schliess di uns a und mach mit!

Unses gmeinsame Ziel

Mir bereite i de Altstadt Rhyfälde ä 4-tägigs Fescht vor. Mir organisiere die gsamti Feschtmeile mit TOP-Unterhaltig. Mehreri Umzüg durch d’Gasse, Schnitzelbänk i de Beize, Chinderfasnacht und vieli Guggekonzärt träge zu de tolle Schtimmig bi. Es chömme vo Noh und Färn vieli Bsuecher:inne und Gastgugge, wo mit uns die 5. Johreszyt gniesse.

Das chasch du bewirke

• Du unterstützisch de Vorstand vo de Fasnachtsgsellschaft Rhyfälde (FGR) bi organisatorische und bauliche Massnahme

• Du bisch verantwortlich, dass d’Infrastruktur i de Gasse bi de Aliferig in Empfang gnoh und korräkt platziert wird – und denn au wieder bi de Abholig

• Du hilfsch mit, dass alli Standbetriber:inne uf de Gass ihre Platz händ und de Stromaschluss parat isch

• Du dekoriersch d’Altstadt zäme mit de Füürwehr mit unsere Fähnli

• Du stellsch Infotafele, Werbebanner und d’Umzugsyteilig uf

Das bringsch du mit

• Freud a de Fasnacht in unsere Altstadt vo Rhyfälde

• Bereitschaft zu gwüssehafter und sälbständiger Mitarbeit

• Ordnigssinn füre Lagerruum und gwüssi Fitness zum chöne apacke

• Offeni und ufgschtellti Art